Pages

Friday, April 10, 2015

مفضلات الفترة الي راحت ❤







السلام عليكم ورحمة الله
من زمان عن مواضيع المفضلات ماعرف ليش أنا ماني صحبة معاها بس عارفة انكم تحبوها وفي منتجات كثيرة جربتها وما أفردت لها مواضيع خاصة إن شاءالله راح أحاول أتكلم عنها بشكل بسيط هنا عشان لايطول البوست وليش حبيتها وبالأيام الجاية أفرد لها مواضيع خاصة على المدونة .

طبعا هالبوست أضفت فيه مفضلات خمسة شهور فايته أنا عن نفسي ماحس تتغير منتجاتي من شهر لشهر حتى كل شهر أضيف مفضلات بس إن وحسيت تغيرت راح أنزل المفضلات بفترات أقصر ❤








نبدأ بمنتجات العناية 




من اليسار 

1/ 
ماء كاودلي للبشرة استخدمته كثير الفترة الي راحت وطبعًا اللي يتابعني بيعرف أن برنامج العناية الفترة الماضية لبشرتي كان مجموعة الريجمنت بس حاليًا بديت اقللها لأني ناوية أقطعها وابدأ برنامج عناية ثاني على خير .

ماء كاودلي صرت استخدمه بعد غسول البشرة بدل خطوة الترطيب بداية اليوم ولأن بشرتي دهنية أكتفي فيه منعش ويرطب وماسبب مشاكل لبشرتي ومايخليها تلمع مثل المرطبات المغذية للبشرة الدهنية والمختلطة اللي غالبا افضل استخدمها قبل النوم  .

هو عبارة عن مياه حرارية معدنية مفيده لترطيب البشرة وتهدئتها ومحاربة الشيخوخة لإحتوائها على معادن وفيرة ، مفيدة للبشرة الحساسة المعرضة للجفاف إذ تحتوي على الصوديوم وهو أهم مكون للحد من الحساسية والكالسيوم العنصر الثاني مساعدعلى نعومة البشرة .

متوفر أون لاين سعره بحدود ٩٠ ريال 
2/

شامبو من كريستاتس  KÉRASTASE DISCIPLINE BAIN FLUIDEALISTE

شامبو تطهير وإصلاح للشعر من أكثر الأنواع اللي ناسبوا شعري من مجموعة كريستاس أنا نزلت لكم صورة على الانستغرام قبل سنة وقلت إني بجربهم وبإذن الله راح أنزل بوست عن كل الشامبوهات اللي جربتها من كريستاتس ورأيي فيها وعشان تكونوا على حيطة نوعية شعري جاف من الجذور للأطراف وكيرلي مستخدمة عليه حنا لّش .

هالشامبو للشعر الجاف مخصص للشعر الكيرلي وضد الرطوبة لمدة توصل ٧٢ ساعة هذا إذا ماغسلتي شعرك خلال ثلاث أيام أنا عني جربته لمدة يومين بدون غسل شعري ، حبيته مرة ينظف ويطهر فروة الشعر وبنفس الوقت صيغته مكونة من الكيراتين تستعيد حيوية الشعر وتعيد بنائه بشكل جميل ولطيف ، وايضًا من مكوناته الاحماض الأمينية مشتقه من بروتين القمح والسراميد فعلا ينعم ويقوي الشعر والمفروض إنه يحمي من الرطوبة لكن رطوبتنا في الشرقية قاتلة مافي ولا شامبو أو علاج يمكن يحمي الشعر منها :/ ، وبعد تجفيف الشعر راح تلاحظي الوقت أقل والنتيجة جدًا خرافية ملمس ناعم وخالي من التجاعيد ولو فكرتي تعملي شعرك لورات أو كيرلي بأي جهاز راح يحافظ لك على النتيجة فترة أطول . حبيته جدًا وراح اشتري المجموعة كاملة بإذن الله 

متوفر بالصالونات سعره بحدود ١٢٠ ريال

 ٣/

كريم علاجي من بايوديرما اتودرم بالزنك
Bioderma ATODERM P.O. ZINC cream

صيغة الكريم دسمة ، مخصص للبشرات الجافة أو المختلطة المعرضة للقشور ، يعيد هيكلة بناء الجلد المتضرر ويرطب البشرة المتهيجة والجافة والمعرضة للحكة ، يمنع حتى انتقال العدوى البكتيرية الثانوية ، ليش حبيته رغم إن بشرتي دهنية ! 

فترة ماقبل وأثناء وبعد اختباراتي جتني حكة في الجفن العلوي للعيون والرقبة من الخلف وصار عندي لما أحك زي الجفاف الابيض والطفح الجلدي وأنا وقتها ماكان لي مزاج ابدًا مستشفى أهم شي عندي دراستي وانتوا لاتصيروا مثلي :/ المهم إن هالكريم الحمدلله جاب نتيجة وراحت الحكة وخف الطفح الجلدي واختفى نهائىًا بعد اسبوعين ثلاث من الاستخدام بشكل يومي مرتين لثلاث في اليوم ، وكل ماصار ورجع برجع استخدمه .

متوفر بالصيدليات سعره بحدود ١٠٠ ريال



٤ - ٥ / 

حليب مرطب للجسم من سوب آند غلوري
مافيه شي مميز غير ريحته الجميلة جدًا أحبه مرة وعندي روائح سوب آند غلوري ماتنمل ابدًا ، ريحته تستمر ليوم بعد الشاور وغالبًا استخدم معاه كريم أو زيت مرطب والفترة اللي راحت استخدمت معاه زيت ناديرا من كرابتري وايفلين جميل ويرطب ويغذي بشرة الجسم للحمام الثاني والحلو فيه ماهو دهني مجرد ماتمسحيه على الجسم تمتص البشرة ويختفي .

الحليب متوفر في صيدلية بوتس سعره بحدود ٦٥ ريال
والزيت أون لاين سعره بحدود ١٥٠ ريال 



٦/ 

كريم توحيد اليدين من لوكيستيان
l'occitane brightening hand care

وعود المنتج يمنحك يدين ناعمة وحماية ضد الأشعة فوق البنفسجية وتوحيد وتفتيح ، هو تبع مجموعة الخلود من لوكيستيان يقلل من علامات الشيخوخة ويرطب اليدين بصيغة ناعمة وخفيفة أقرب للوشن .

حبيته وماصرت استغني عنه استخدمه أي وقت مو ضروري أكون طالعة دايم ادمجه مع كريمات الترطيب ماحسه يفتح اليدين أو المفاصل ، يوحد اليدين ويحميها من الشمس والشي الأكيد إنه يمنح اليدين شبابية ونعومة وويصقل الجلد هالنتيجة ماشفتها مع أي كريم لذلك أنا راح أرجع أشتريه بس يخلص وهذي ثاني علبة استخدمها .



محلات لوكيستيان ب ١٥٠ ريال 




منتجات الجمال 





من اليمين 

١/
فاونديشن دولشي آند قبانا المات
جميل وعجيب يمنح البشرة مظهر مات طبيعي مناسب للبشرات الدهنية والمختلطة فقط استخدمته فوق ٥ ساعات مادهن ولا خطط ولا تأكسد وتغطيته فل كوفر وتقدري تخفيفها وهذا المطلوب بالنسبة لي وشكلي راح أطول وأنا استخدم هالفاونديشن لأني كنت أدور على شي يشبهه ، ويستاهل المدح اللي جاه عيبه الوحيد درجاته محدودة مرة وماهو متوفر عندنا ، يعني أنا لون بشرتي مافيه يا أفتح يا أغمق شريت الأغمق ١٤٠ وراح اخذ ١٢٠ وادمجهم مع بعض ومانصح ب ١٣٠ خصوصا اللي اندرتونها دافئ لأن الدرجة على وردي 

متوفر أون لاين ب ٢٧٠ ريال 



٢/
ماسكرة الحواجب من ماك
استخدمها لتفتيح الحواجب درجة اللون : beguile

الماسكرة فيها قليتر خفيف ومو واضح أنا شخصيًا حبيتها المنتج فيها بطل ويكفي فترة طويلة ولونها ولا أروع خصوصا مع لون بودرة الامسكا ثندر وتدوم فترة طويلة على الحاجب لين ماتغسليها ورائحتها ورد  .

طريقة استخدامي
 اذا طلع منتج زائد أمسحه بمنديل ، من البداية أبدا أمسك شعر الحاجب بإتجاه معاكس لنمو الشعر وأصبغ الشعره عشان مايكون شكلها نايم يعطيها شكل فرش ومبعثر هالحركة اسويها لنص الحاجب والباقي أصبغة بنفس اتجاه نمو الشعر . 


محلات ماك ب ٩٩ ريال 



٣/
كونسيلر ماك برو لونغ وير
طبعًا كاتبه عنه قبل سنتين على مدونتي وأول ماشريت اللون الغامق وصرت استخدمه كمصحح وبعدها شريت اللون الفاتح ، أحبه ماستغنى عنه لأنه مايخطط يعطي منظر طبيعي واستخدمه حتى للمكياج اليومي أحيانا مو دايم 


محلات ماك ب١٠٠ ريال 






٤-٥ /
بلاشر اكسبوزد من تارت أحبه للنو ميك آب وللاستخدام اليومي طبيعي وجميل ويعطي البشرة نضارة وانارة ، الي بالصورة بلاشر pinstripe من ذا بالم هذا البلاشر كان الطريق للبشرات الغامقة ماتوقعت راح أحبه هالكثر ، أنصح كل بنت فيه مهما كان لون بشرتها راح يناسبها خصوصا الحنطيات والبرونز وعلى ضمانتي  .



متوفر أون لاين
تارت بحدود ١٠٠ ريال
ذا بالم ٩٠ ريال





بالنسبة لمفضلاتي بالأرواج البنك والنيود كانوا مسيطرين 

من اليسار 

١/
روج من كلر بوب اسمه لومير استخدمه الشهر الي فات بشكل متكرر لونه جدًا جميل يناسب أغلب درجات البشرة ، جاي على موف بنسبة ٧٠٪ وشويه بنك رمادي و نوعيته مات وثابت فترة طويلة حتى مع الأكل .



متوفر أون لاين ٢٠ ريال



٢/
روج من ليبستيك كوين 
هذا الخط اللي يجي علبته ذهبية اسمه saint للاستخدام اليومي يحتوي على ١٠٪ فقط مناللون pigment ، ومع ذلك يمنح الشفاة تغطية متوسطة ويستمر لفترة طويلة ، مع الأكل يحتاجتجديد طبعًا، اللون بهذي الصيغة يعطي الشفاة لوك درامتيكي وتألق 

saint تجي ٩٠٪ مكونات طبيعية ترطيبيه 
غير لامع ويعطي تغطية متوسطة 


مميزاتها
- ١٠٪ لون صبغي
- تغطيه متوسطة
- ترطيب يستمر لفترة طويلة 
- بدون عطور ولا بارابين أو أي مواد حافظة 

بداية تطبيقه راح يكون بمنظر كريمي ساتان ع الشفاة ودقائق ويصير بدون لمعة وكأنه الشفاةطبيعية ، دائماً يشبهوا رائحته بالماء يعني أنه عديم الرائحة .

من اليسار اللون الأول أسمه saint pink حبيته للصباحات والطلعات السريعة فعلا اذا ماتاكلييظل فترة طويلة واذا بدأ يروح يصير كأنه لون الشفاة طبيعي مو مقطع

أون لاين أو دبي مول ستور بلومينغديلز ١٢٥ ريال



٣/
ارواج tarte الكريمية مع الزبدة كوصف عام للنوعية هذي فهي تمنح الشفاة تغطية طبيعية متوسطة وكأن الشفاة بدون روج أي سمك اللون متوسط وخفيف بلمعة كريمية دسمة ، مناسبة للاستخدام اليومي والصباحي أو مع الشدو الداكن ، تمنح لوك بسيط وناعم ، ومناسبة حتى للشفاة الجافة تعمل كمسكن للشفاة الجافة بإضافة اللون ، لاتدوم وقت طويل تحتاج تعديل كل ساعتين خصوصا مع الأكل تختفي وبالرغم من ذلك أنا أحبها مرة لأني أحب اللوك الطبيعي واعتمده بأغلب طلعاتي صباحية كانت أو ليلية .

منتجات تارت خالية من البارابين وتحتوي على الأحماض الدهنية الأساسية والجامدة التي تمنح الشفاة ترطيب عالي ، كون هذا النوع زبدي فهو طبعا يحتوي على زبدة الشيا وهو بالتأكيد يحتوي على فيتامين a اللي يمنح الشفاة مدرونة ويهدئها وحتى الألوان مشتقة من المعادن الطبيعية .


لون Angelic Nudeهاللون أجمل وأجمل على البشرات الدافئة ومناسب حتى للنارية هو نيود وبنك والنيود الطاغي عليه


متوفر أون لاين بحدود ٩٠ ريال 




٤/ 

LIPSTICK من الماسكا . 

نوعية الروج مات بتغطية فل كوفر

أقدر اقول عنها كريمية بنسبة ٢٠٪ تحتاج تقشير الشفاة قبل الاستخدام ، ماحسيت الشفايف تخطط معاه اللي تحب المات بتعجبها النوعية هذي ، الثبات ٥ من ٥ بدون أكل  اللون جدا جميل ومن البيست سلر لما احترت اخذته وأنا مغمضة وماتحسفت 

اسمه 
Climax
من الورديات الخجولة وحبيته على البشرات الدافئة ( السمر ) أكثر من النارية ( الفاتحة )


متوفر أون لاين أو دبي مول ب١٢٥ ريال



-





عطر عنبر سلطان من سيرج لوتنز
كانت عطري المفضلة خلال الفترة اللي راحت وهي من العطور الي ماقدر استغنى عنها ابدًا لأنها تمثلني حسيتها فعلا أنا ، امتلكت حواسي ومشاعري ومثلتني بأبهى طلة ، أكيد كل واحد منا في عطر حس انها صُنعت من أجله وبكل مكوناتها ونوتاتها وتنقلاتها توصف مشاعره ، جدًا استمتع معها من بداية العطر لنهايتها أعشقها بشكل ❤ آبدع سيرج فيها بإحساس مرهف ومشاعر جياشة قوية تثبت حضورها ، العطر من أول استخدام انسألت عنها لأنها فعلا رائح تجذب أصحاب الذوق العالي والمزاج الفخم مراح أتكلم عنها بشكل مطول هنا لأني أبي أفرد لها بوست لحال ، مكوناتها خشب صندل كزبرة مرة فانيليا عمبر ورقة الغار والباتشولي وتوابل ونبتة الراتنج وورقة الآس 

أحس مشاعر أم كلثوم في مقطع أغنيتها ألف ليلة وليلة يعبر عن مشاعري للعطر ، لأصحاب المزاجات الأصيلة 

" ازاى ازاى اوصفلك ياحبيبي ازاى 
قبل ماحبك كنت ازاى ياحبيبي ❤ "



متوفر أون لاين أو دبي مول ستور بلومينغديلز ٤٣٠ ريال


-

في متابعة على الانستغرام سألتني عن خطي في العطور وطبعًا أشكرها لأنه مو بس راح يكون اضافة إنما يساعد المتابعين على تخمين رائحة العطور خصوصا الغير متوفرة عندنا أو معرفة ذوقي العام في العطور

- العنبر الحار الناعم البلسمي 
- المسك بشرط مايكون أساس في العطر 
- اللافندر المقطر 
- الورد بكل أنواعه وأطيافه 
- خشب الصندل والتوابل والفانيلا المخففة والمرة وشجرة العبهر 

مافضل العطور السويت الحار ولكن في عطور تثبت حضورها مثل اي دولي من ديبتيك كتبت عنها من زمان وجاني شباب وصبايا على تويتر يشكروني على التوصية وقبل فترة حطيت مجموعة عطور عند أخوي وقلت له وين تفضل اختار اي دولي من ديبتك وفيزا من روبرت بيجوت 



أتمنى يكون البوست عجبكم 
يسعدني تواصلكم معي بالكومنت 
كونوا بألف بخير 


12 comments:

  1. روعه البوست حبيييته بس كونسيلر مات شريته هالشهر ب١٣٧ 😩💔

    ReplyDelete
    Replies
    1. تسلمي ياقلبي .. ماك للأسف اسعارهم كل مالها وترتفع بلا رقيب ! انا الأول شريته ن هنا ب ٩٩ ريال والثاني من نوردستورم بحدود الـ ٧٠ ريال بس حطيت السعر زي ماهو عندنا طلع أرتفع

      شكرًا لك ياقمر سعيدة بتواجدك

      Delete
  2. مرررره جميل هالبوست والريحة ولاآحلى
    ذوقك بالعطور جدا رايق وراقي بنفس الوقت
    وبراند سيرج لوبنز متوفرة في اوروبا كم مررة اشوفه واحتار بالروائح
    واتركه لكن حمستيني آجرررب العنبر
    ربي يسعدك

    ReplyDelete
    Replies
    1. مرورك الجميل والله مسك ..تسلمي لي ولتواجدك الدائم في مدونتي وانستغرامي ❤ وبإذن الله تعجبك جربيها وقولي لي رأيك

      Delete
  3. يعطيك العافية عالبوست.. بس فيه نقطة حبيت أفيدك فيها انتي ومتابعاتك ان عطور سيرج وديبياتك وبيريدو متوفرة في موقع
    Fragrancex.com
    وفيه أيضا ماركات ثانية مثل بوند وغيرها اللي ماأتذكرها �� ..
    طبعاً الفايدة مو هنا الفايدة ان أسعارها في الموقع مرة رخيصة.. يغني عطر عنبر سلطان مصلاً موجود في الموقع ب 298 ريال ��.. ولما قلتي ان سعره فوق 400 صدمتيني..

    ReplyDelete
    Replies
    1. شكرًا ياقمر على الإضافة ليتك كتبتي اسمك ..
      اعرف الموقع بس دايم اسمع مشاكل مع الشحن والجمارك خصوصا وإن الشركة الناقلة هي dhl
      هل جربتي تطلبي وصادفتك مشاكل ولا !

      هو أكيد تظل المواقع ارخص من المحلات لأن المحلات تعرفي اجار ورواتب موظفين وخدمة

      شاكرة تواجدك مقمدا

      Delete
    2. العفو ياقمر.. اي أنا دايما أطلب منه وفعلاً كان في السابق دي اتش ال ياخذ رسوم جمركية عالشحنات اللي سعرها يتعدى ال 150 دولار وأكثر من مرة عملوا فيني هالحركة.. بس ألحين ماأتوقع يقدرون يسوون هالشي مع القوانين الصارمة لوزارة التجارة مع اني مازلت أخاف وأخلي طلبياتي مقسمة دايمالأقل من 150دولار في كل شحنة ومو خسرانة شي الشحن مجاني والي خصم 10 بالمية فوق هذا كله..
      بالعكس موقع جميل وأنصحك بالتعامل معاهم خصوصاً ان الدفع بالباي بال..
      بالنسبة للروايح لاتطلبين الشي الا اللي عارفة ريحته.. مع اني غامرت أكثر من مرة وطلبت عطورات حسب تقييمها بالموقع وانا وحظي بعضها يطلع جميل وبعضها مو على ذوقي..

      اسمي حبيت يكون مجهول لأني مو صحبة مع المدونات بس هالمرة لأني أبي أشوف تقييمك لعطر عنبر سلطان بما اني طلبته من الموقع ��..
      يعطيك العافية وألف شكر لك.. ��

      Delete
    3. ماظن إنهم تركوا عادتهم رغم مقاطعة الناس لهم .. تخيلي مرة وصلتني هدية من لكويت شحونها لي على dhl تخيلي إنها هدية خلوني آدفع عليها رسوم ١١٥ ريال أظن !

      المشكلة إن أحيانا العطر يوصل سعرها ٩٠ ل ١٢٠ دولار على كذا مراح اقدر اشحن إلا كل عطر لحال :/
      دخلته أمس شفت عطور ديبيتك حلو سعرها بس الاغلب اوت اف ستوك .. ان شاءالله أجربه الأيام الجاية واقارنة بكذا موقع عندي ..

      انا انكبت مرة وحدة بس بعطور شريتها بدون ماشمها ومنها ما تأدبت يعني احيانا يجي في بالي باخذ هذي العطر حتى لو ماشميتها ، تابعي مدونين عطورهم نفس ذوقك يمكن هالشي يسهل عليك ..

      عنبر سلطان كرائحة
      ١٠/١٠
      وثبات
      ١٠/١٠

      من أجمل العطور اللي شميتها بحياتي
      طبعا ثقيلة شوي تعتبر وليلية ولكن أنا احيانا استخدمها في الدوام الصبح
      انتظر تجربتك لها أكيد ..


      حياك الله ياقمر

      Delete
    4. غريبة.. المفترض ان الهدية ماعليها رسوم جمركية لأن شفت أكثر من شخص يقول ان اذا بغيت الشركة ماتاخذ عليك رسوم اشحنها كهدية لأن الهدية مايحطون معاها الفاتورة وبكذا ماراح يعرفون كم ثمن الشحنة..
      عاد تشحني كل عطر لحاله ويكون فري شيبينغ ولا تشحنين كمية وياخذون عليك مبلغ مو من حقهم..

      ان شاء الله اكيد اول مايوصل راح أكتب لك رايي بصراحة حتى لو ماعجبني ��
      ......

      بالتوفيق

      Delete
  4. يعطيك العافيه البوست يجنن ممكن تتكلمين في بوست عن اعدادات تصويرك ماشاء الله يجنن

    ReplyDelete
    Replies
    1. الله يعافيك ياقلبي عيونك الجميلة
      وبإذن الله تامري ..
      حياك الله

      Delete

Members